@##/ /rgya gar skad du/ saM gra ha garb+ha
nA ma/ bod skad du/ snying po bsdus pa zhes bya ba/ thugs rje
chen po dang ldan pa la phyag 'tshal lo/ /khams gsum sdug
bsngal rgya mtsho che'i/ /dpa' rlabs shin tu 'khrugs

pa ni; /dge dang mi dge la sogs pa'i/ /zag bcas las las nges
par 'byung/ /de dag chags sdang la sogs pa'i/ /nyon mongs rgyu
yis bskyed pa ste/ /de dag 'byung ba'i rgyu nyid kyang/ /yid
du 'ong dang mi 'ong sogs/ /gnyis su 'dzin pa nyid las byung/
/thams cad 'byung

ba'i rgyu nyid ni/ /rtag dang khyab dang gcig pu sogs/ /dngos
por 'dzin pa'i gdon yin te/ /de bas skal ldan skyes bu ni/
/bdag gzhan grol ba don gnyer bas/ /rten cing 'brel 'byung la
sogs pa'i/ /rigs pa gang la goms pa yis/ /dngos por 'dzin pa
bzlog par bya/ /

phyi nang chos rnams thams cad kun/ /mtshan ma thams cad dang
bral ba'i/ /nam mkha' lta bur shes byas la/ /dngos 'dzin gdon
gyis brlabs pa yi/ /'gro kun yul du byas nas ni/ /sdug bsngal
rgya mtsho skems byed pa/ /snying rje chen po sngon 'gro bas/
/bdag gzhan don kun

@293b 'byung ba yi/ /rin chen byang chub sems bskyed bya/
/byang chub spyod pa rlabs chen pos/ /pha rol phyin drug la
sogs la/ /mnyam gzhag langs pa'i sbyor ba yis/ /lam snga rim
gyis bgrod byas te/ /sgrib pa rnam pa gnyis bsal na/ /tshogs
gnyis yongs su rdzogs pa

las; /'bras bu sku gsum bsgrub par bya/ /sku gsum 'byung ba'i
mtshan nyid kyang/ /stong nyid nam mkha' lta bu las/ /brtsal
med thugs rje'i sprin 'byung zhing/ /sku gnyis bdud rtsi'i chu
rgyun gyis/ /khams gsum tha ma'i rgyud brlan te/ /byang chub
snying po'i sa bon las/ /

dge ba'i lo thog smin par 'gyur/ /sangs rgyas kun gyi snying
po ste/ /'di ni snying po bsdus pa yin/ /tha ma'i dus su gyur
pas na/ /tshe thung nad mang longs spyod dman/ /rkyen ngan bar
chad mang ba yis/ /yun rings gnas pa'i mthu med pas/ /tshig
rjes gcad par mi nus kyi//

bshes gnyen dam pa bsten bya ste/ /shin tu brtson pa'i sems
ldan pas/ /g.yang sa rab tu dran byas te/ /bdag gzhan grol
bar bya ba'i phyir/ /snying po myur du bsdu ba yin/ /brtse bas
'di byas bsod nams kyis/ /skal ngan sems can thams cad kyang/
/byang chub

sems dang ldan gyur nas/ /snying po myur du sdud par shog
/snying po bsdu ba zhes bya ba/ slob dpon chen po dpal mar me
mdzad ye shes kyis mdzad pa rdzogs so// //paNDi ta de nyid
dang/ lo tsA ba dge slong tshul khrims 'byung gnas deb rtses
bsgyur cing zhus te gtan la

phab pa//